LACRIM - لاكريم اسطورة الراب الفرنسي

اسطورة الراب الفرنسي              لاكريم            LACRIM

 

كريم زنود معروف ب LACRIM لي شد الراپ الفرنساوي فالأعوام الأخيرة و لي خلا الميديا تدوي عليه رغما أنهم ماكيحملوش Les Rebeus أي العرب لي تزادو ف فرنسا، لي مهم هو أن كريم خلا الميديا كلها تدوي عليه بالطريقة لي بغى هو مي نسى أن الشهرة بزاف عندها الثمن لي غادي ندويو عليه مور هاد المقدمة
نشوفو الطفولة د كريم كيف دازت، لي عارفينو أنه من أصول جزائرية ولكن راه خلوق و ترابي ف فرنسا، بحيث كبر ف Chevilly-Larue فالجهة الجنوبيد د باريس و بالضبط فبلوك سميتو Val-de-Marne لي دوى عليه كريم فشلا طراكات

ملي دار 11عام خرج من المدرسة وبدا حياة هامشية بحيث تعلم دروس الحياة من الشارع، ملي دار 14عام بدا أول براكاج ديالو، و من ديك الوقيتا بدات حكايتو مع الشارع، عامين دازت أي 16عام فعمرو تشد كريم فمحاولة سرقة واحد المحل فباريس، و قاليه القاضي بلي هاد المرة ماغديش يخرج و دوز عام فسجن الأحداث بحيث كان ديجا وقف قدام داك القاضي مرات عديدة
الطفولة د كريم فعلا كانت صعيبة بحيث شخال من مرة نعس فالزنقة ولا مع عشرانو و شحال ن مرة تشد فالحبس و دوز أشهر عديدة

باش يدير عقلو و يوقف عيشة الزنقة لقا كريم بلي الموسيقى هي الحل، من بعد شلا مشاكيل قرر كريم يعيش ف مرسيليا ف2009
فالأول بدا كريم غير ف دي فييت مع عشيرو Mister You لي كان طلاقا معاه فالحبس و من داك نهار لقى عشيرو لي عندو تقريبا نفس التفكير بحيث باش يبيعو الألبومات ديالهوم و يتمشاو مزيان دارو الحشيش فوسط پوشيط د الألبوم ولي كيبغي يشري الحشيش كيشري معاها حتى الألبوم ههههههه
ف2012 بدا كريم طريقو فالإحترافية و خرج أول ألبوم ديالو لي سميتو Faites entrer Lacrim لي كانو فيه فييت مع كل من Le Rat Luciano, Rim'K de 113, Keny Arkana, Mister You, Atheena و باش يدير الصداع و يتمشالو الألبوم دار واد وريقات د الربحة ف الپوشيطات د الألبوم فيها الربحة د 1500 € و خدا داك الألبوم المرتبة 16 د المبيعات د العام ف فرنسا و طبيعة الحال من هنا كتبان الزنقة آش كتقري

مور الألبوم خرج ميكستيپ سميتو Toujours le même و كانو فيه شي طراكات فعلا مقودين و شلا فييتورينغ مع Niro, Seth Gueko, Rimkus, Le Rat Luciano, Hayce Lemsi, Mister You, Wanis, Still Fresh, Léa Castel, Médine, Kamelenouvo, Kalash L'afro, Klakette ، درجة درجة بدات كتبان القوادا دهاد خونا لي غتعطي النتائج ديالها فالمستقبل

2013 خرجات EP سميتها Né pour mourir فيها 10طراكات لي كانت السباب باش وقع عقد مع لابل Def Jam لي فعلا عندها تاريخ كبير بحيث خدمات مع أكبر الفنانا د المريكان
دار لاكريم كليپ سميتو Dos en or /www.youtu.be/P1B9tWGaUGU و لي فعلا غريب هو أن الكليپ د لافويين La Fête des Mères تصور بنفس الطريقة و نفس السيناريو و طبيعة الحال هنا كنلاحظو البلاصة لي شدها هاد خونا فالساحة الفنية بحيث خلا لي دازو قبل منو يقلدوه

ألبوم Corleone خلا الجمهور المغاربي يتعرف على لاكريم و خلاه يشد الساحة الفنية دالراپ ف فرنسا كلها، الألبوم خرج مع لابل Def Jam و هنا بان الفرق د الكاليطي و الإحترافية و النتائج هي الألبوم تباعت 28033 نسخة ف سيمانا اللولى و خدا ديسك دور رغم اللغة القاصحة لي كانت فيه

2015 هرب لاكريم من البوليس ن المغرب بسباب المشكل لي ناض ليه فواحد الشقة ف مارسيليا بحيث لقاو فيها الغبرة و الحشيش و السلاح و لي خلاه متهم من الدرجة الأولى فهادشي هما البصمات د كريم لي لقاوهم فواحد الكلاشينكوف
هرب ن المغرب و بقا روشيرش مي واخا المشاكيل منساش الراپ و استطع يسجل RIPRO Vl1 لي المعنى ديالها هو Rusé, Insoumis, Professionnel, Respectable, Omerta و تسجل فكل من المغرب ف ستوديو د البيغ و الجزائر وكان فيه دي فييت مع Sadek, Migos, Gradur, YT Triz, Rimkus, SCH, Nessbeal, Young Breed, Billy Blue فأول سيمانا ملي خرج خدا المركز اللول ف طوب د الألبومات ف فرنسا و استطع يحقق رقم قياسي بحيث خدا ديسك دور غير فشهر الول

القوادا غادية و كتزاد ملي خرج RIPRO vl2 و فكل سيمانا تقريبا كيخرج فالكليپات و الفلوس غا دخلا و واخل رجع لفرنسا و تشد فالحبس و موقفوش الكليپات و هادشي غايبقى فعلا فالتاريخ د الراپ الفرنسي

لاكريم استطع يحقق حلم شلا رواپا ف مدة قصيرة بزاف و وصل تقريبا للعالمية ملي دار فييت مع French Montana و Migos
و رغم من كل العوائق إلا أنه برهن لينا بلي العزيمة هي كلشي، لاكريم فهاد الأثناء كيدوز العقوبة الحبسية لي المدة ديالها 3سنين و كنتمناو ملي يخرج يزيد يخرج معاه القوادا